ភ្នំពេញ៖ ទីប្រឹក្សារដ្ឋនៃក្រសួងការបរទេសសហរដ្ឋអាមេរិកលោក Derek Chollet បានអះអាងថា អាស៊ានគឺជាចំណុចស្នូលសម្រាប់គោលនយោបាយការបរទេសរបស់សហរដ្ឋអាមេរិកក្នុងតំបន់ឥណ្ឌូ-ប៉ាស៊ីហ្វិក និងរំពឹងដល់ការធ្វើការយ៉ាងជិតស្និទជាមួយកម្ពុជាក្នុងនាមជាប្រធានអាស៊ាននៅ ឆ្នាំ២០២២ផងដែរ។
ថ្លែងក្នុងជំនួបជាមួយរដ្ឋមន្ត្រីការបរទេសកម្ពុជាលោក ប្រាក់ សុខុន លោក Derek Chollet នៅថ្ងៃទី១០ ខែធ្នូម្សិលមិញ បានលើកឡើងថាប្រធានាធិបតីអាមេរិកលោក ចូ ប៉ៃដិន កំពុងរង់រំពឹងដល់ការធ្វើម្ចាស់ផ្ទះនឺកិច្ចប្រជុំកំពូលអាស៊ាន-អាមេរិក នៅទីក្រុងវ៉ាស៊ីនតោន នាពេលឆាប់ៗខាងមុខ ដែលនឹងលោក ចូ ប៉ៃដិន នឹងពិភាក្សាដោយផ្ទាល់ជាមួយសម្ដេចតេជោ ហ៊ុន សែន ពីបញ្ហា និងរបៀបវារៈជាច្រើនទៀតដែលរួមមានទំនាក់ទំនងដៃគូសន្ទនាអាស៊ាន-អាមេរិក ការឆ្លើយតបនឹងជំងឹកូវីដ-១៩ និងការស្ដារសេដ្ឋកិច្ចឡើងវិញក្រោយជំងឺរាតត្បាតជាដើម។
ឧបនាយករដ្ឋមន្ត្រី ប្រាក់ សុខុន បានស្វាគមន៍ដល់ការគាំទ្ររបស់អាមេរិកចំពោះតួនាទីកម្ពុជាក្នុងនាមជាប្រធានអាស៊ានឆ្នាំ២០២២ និងឯកសារសមិត្ធផលនានា ដើម្បីពន្លឿនកិច្ចខិតខំប្រឹងប្រែងកសាងសហគមន៍អាស៊ាន និងលើកកម្ពស់ទំនាក់ទំនងជាមួយដៃគូខាងក្រៅរបស់អាស៊ាន។ លោកក៏បានស្វាគមន៍ផងដែរចំពោះការបន្តការប្ដេជ្ញាចិត្តរបស់សហរដ្ឋអាមេរិក ក្នុងការថែរក្សាភាពនៅកណ្ដាលរបស់អាស៊ាន ក៏ដូចជាសន្ដិភាព និងវិបុលភាពក្នុងតំបន់។
កាលពីថ្ងៃទី៩ ខែធ្នូ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានថ្លែងថាក្នុងខែកុម្ភៈ ឆ្នាំ២០២២ ខាងមុខសម្ដេចនឹងអញ្ជើញទៅសហរដ្ឋអាមេរិកក្នុងនាមជាប្រធានអាស៊ានដើម្បីជាធ្វើសហប្រធាននៃកិច្ចប្រជុំកំពូលអាស៊ាន-អាមេរិក ជាមួយប្រធានាធិបតីអាមេរិកលោក ចូ បៃដិន៕